🌸තමා රැකීම සහ තමාගෙන් නිදහස්වීම🌸

ජාති, ජරා, මරණ, ඉපදීම, ලෙඩවීම, මරණය ආදිය ලෝකය ඇති තැන තථාගත දහම අවශ්‍ය වේ. තථාගත දහම තුළින් ජාති ජරා මරණ තමා කරා නොයන වැඩ පිළිවෙලක් නැත. නමුත් අද, සොයන්නෙම බුදු දහම තුළින් තමාට ජාති ජරා මරණ නැති කරන්නයි. සසර ගමන් කරන තුරුම " මම" රැකගන්නමයි දඟලන්නෙ. ලෙඩ රෝග වලින් මරණයෙන් රැකගන්න බලනවා. ඒ වගේම තම තමන්ගේ අදහස් සපුරාගන්න බලනවා. තමන්ගේ හිතැඟි පරිදි යමක් වෙන්නේ නම් දහමක් කුමටද? 

එනමුත් ලෝකයාට එය වැටහෙන්නේම නැහැ. දහම යැයි සිතන්නේම තමන්ගේ සිතැඟි පරිදි කටයුතු කිරීමටයි. තමාට තමාව වැදගත් කරවන්නමයි හදන්නෙ. තම හිතට වහල් වෙන්නටමයි හදන්නේ. තමාට තමන් වැදගත් නොවුයේ නම් තම අදහස් වලට ඉඩක් නොලැබේ. දහමට පමණක් ඉඩ ලැබේ. දහම යනු තමන්ගේ අදහස නිවැරදිව කිරීමක් නොවේ. තමන්ගේ අදහස් වැරදි බව හමුවීමමයි දහම වන්නේ. 

අද සොයන්නේම බාහිරින් නිදහස් වන්නටයි. කෙසේ නම් බාහිරින් නිදහස් වන්නද? වැරදි දේත් බාහිර තිබේ. නිවැරදි දේත් බාහිර තිබේ. වැරැද්ද තමාය. තමා වැරදි බව අත්දකින දහම ලැබෙන්නේම බාහිරින්‍ ය. "පරතෝචඝෝසෝ ". තමාව රැකගැනීමේ අරගලය කවදානම් නිදහස් වේවි ද? 

මෙකරුණ දකින විට බාහිරට කිසිදු වැරැද්දක් නොදමයි. මෙත් සිත් වැඩීමට එය රුකුලකි. කයිනුත්,වචනයෙනුත්, මනසිනුත් මෙත් සිත සහිතම ක්‍රියාවන් කරයි. එමෙන්ම තමාම වැරදි බව මතු වෙන ශුන්‍යතා ධර්මයට කන් යොමයි. අද ශුන්‍යතා ධර්මයට කන් යොමු නොකරයි. ශුන්‍යතාවය යනු තමාව වැරදි බව ප්‍රකට වන දහමයි. අද කැමතිම තමාම නිවැරදි බවක් ලැබීමටය. මෙවැනි සමාජයකට කෙසේ එම දහම ප්‍රකාශ කරන්න ද ? 

එනමුදු ධර්මයට ගෞරවය ඇති තථාගතයන් වහන්සේගේ වචනය ඉක්ම නොයන ඉතාම අතලොස්සක් සිටිනවා. ඒ අය තමන් ට හිතළුවෙක් වෙන්නෙ නැහැ. එවැනි හැකියාවක් ඇතිවිට අධ්‍යාත්මයේ ගුණධර්මම පමණක් ඇතිවේ. සමාජයේ පවතින ප්‍රශ්න, වසංගත, මරණ බිය ඔවුන්ව යට නොකරයි. ඒ ඒ මොහොතේ අප්‍රමාදීව ශුන්‍යතාවයට යොමුවේ. එනම් තමාම වැරදි බව දැකීමට යොමු වේ. එලෙසට දකින විට කෙසේ නම් තම සිතට වසඟ වන්න ද? කුමකට ගැටෙන්නේ ද? කුමකට ආශා කරාවි ද ? අනිකුත් දෑ වන - දැඩි බව, මානය, එකට එක කිරීම, ගුණමකු බව කෙසේ නම් ඇති වන්න ද ? ඔහුව පාලනය කරන්නේම දහමයි. දහමට යොමු වන විට සියලු කෙලෙස් ඉක්මවා ගුණධර්ම සාගරයක් වේ. 

ශුන්‍යතා දහම යනු කුමක්ද බව මේ ලෝකයා නොදකී. අඩුම තරමින් එය ඇහෙනවටවත් අකමැති. එයට කන් යොමු නොකරයි. එනම් තමාම වැරදි බව හමුවන දහමකට කන් යොමු නොකරයි. ඉතින් එවැනි අය තමාව රැකගන්න දඟලන දැඟලිල්ල පුදුමයක් නොවේ. 

අහෝ ! තථාගත දහමට ගිය කළ ? තමා වැරදි බව ඉස්මතු කළ දහමින් තමාව රැකගන්න හදන හැටි. වසංගත වේවා, මරණ වේවා, තම අදහස් , මතවාද සිතුවිලි වේවා මේ සියල්ලම තුළත් තමාව ආරක්ෂා කරන්න දඟලයි. තමා නිවැරදිම කරයි. ශුන්‍යතා ප්‍රතිබද්ධ දහමට මේ නොකල් වේ.

"ආරා නිබ්බාන වුච්චති" - නිවන දුර වේ.

කවරෙක්, කවදානම් තථාගත ශ්‍රාවකයෙක් වේවි ද? ඔහුට නම්....

"සන්තිකෙ නිබ්බාන වුච්චති" - නිවන ළඟ වේ .

මෙය කවුරු හට නම් වැටහේවි ද ? වැටහෙන්නන් සිටී නම් ඔවුන් නිදහස් වේ.( තමාගෙන් නිදහස් වේ.) 

-- පූජ්‍ය අලව්වේ අනෝමදස්සි හිමි (2020.03.21)❣️🙏