🙏බුද්ධ ධර්මයේ ඇති රසය🙏

 

අග්‍රරස ඇති භෝජනයන් කුසපුරා වළඳා තෘප්තියට පත්ව සිටින්නකුට නීරස භෝජනයක් ප්‍රිය නො වන්නාක් මෙන් බුද්ධ ධර්මය ඇසූ පසු, අන්‍ය ශ්‍රමණ බ්‍රාහ්මණයන්ගේ වාද,ධර්ම අප්‍රිය වන්නේය.

🙏 සාගින්නෙන් පෙළෙන්නකුට චතුමධුරයන් යොදා පිළියෙල කළ අග්ගලා ගෙඩියක් ලැබී වළඳනා කල්හි එය කොතැනකින් වැළඳුව ද මිහිරි රසයක් ලැබෙන්නාක් මෙන්, බුදු හිමියන්ගේ ධර්මය කොතැනකින් ඇසුව ද, සූත්‍රයෙන් ඇසුව ද, ගෙය්‍යයෙන් ඇසුව ද, වෙය්‍යාකරණයෙන් ඇසුව ද, අද්භූත ධර්මයෙන් ඇසුව ද සතුටක් ලැබේ. පැහැදීමක් ඇතිවේ.

🙏 රන්වන් සඳුන් ගැටයක් හෝ රත් සඳුන් ගැටයක් ලත් කෙනෙකුට එය කොතැනකින් අඝ්‍රාණය කළත් සුමිහිරි සුවඳක් ලැබෙන සේ, බුදු හිමියන්ගේ ධර්මය අසන්නකුට සූත්‍රයෙන් හෝ, ගෙය්‍යයෙන් හෝ, වෙය්‍යාකරණයෙන්, අද්භූත ධර්මයෙන් කුමකින් කොතැනකින් ඇසූව ද සතුටක් ලැබේ.

🙏 යම් රෝගයකින් පෙළෙන්නකුට දක්ෂ වෛද්‍යයකු විසින් ප්‍රතිකාර කරන කල, ක්‍රමයෙන් රෝග දුරු වී යන ලෙස, බුදු හිමියන්ගේ ධර්මය කොතැනකින් හෝ අසන්නාගේ ශෝක පරිදේව දුක් දොම්නස් උපායාස නැති වන්නාහ.

🙏 ග්‍රීෂ්මයෙන් හා පිපාසාවෙන් පීඩිතයකු සුමිහිරි සිහිල් දියෙන් පිරුණු පොකුණකට බැස පැන් බී දිය නෑම කරන කල, ඔහුගේ ග්‍රීෂ්මය පිපාසාව ක්ලාන්තය සන්සිඳී යන්නාක් මෙන් බුදු හිමියන්ගේ ධර්මය කොතැනකින් හෝ අසන්නාට ඔහුගේ සියලු පීඩා වෙහෙසීම් දැවීම් සංසිදේ.

 අතිපූජනීය රේනුකාණේ චන්ද්‍රවිමල මහානායක ස්වාමීන්වහන්සේ විසින් රචිත සූවිසි මහාගුණය පොත්වහන්සේගෙනි 🙏